Компанијата за резервации на хотели и куќи за изнајмување, Booking.com, соопшти дека ќе отпушти повеќе од 4.000 вработени, што е една четвртина од нејзината работна сила, бидејќи патувањата драстично опаднаа поради пандемијата на коронавирусот.
Отпуштањата ќе започнат следниот месец и ќе траат до крајот на годината, наведува матичната компанија Booking Holding, која е сопственик и на компаниите за резервации на ресторани OpenTable и Priceline.
Како што пренесува SeeBiz, бројот на резервирани соби на Booking во текот на првиот квартал од оваа година опадна за 43 проценти, на 124 милиони, а падот продолжува.
Компанијата уште во мај ги предупреди инвеститорите да се подготват за полошо во вториот финансиски квартал, чии резултати треба да бидат објавени во четврток.
Booking има 17.500 вработени и повеќе од 200 канцеларии ширум светот.
