Кремљ денеска ги коментираше медиумските извештаи за растечкото ривалство меѓу редовната руска армија и платеничката група Вагнер предводена од Евгениј Пригожин, кој не се воздржува од критикување на руската команда.
Конфликтот меѓу руското Министерство за одбрана и платениците Вагнер „постои само во информативниот простор“, изјави Дмитриј Песков, портпарол на рускиот претседател Владимир Путин.
Москва минатата недела објави дека го освоила рударскиот град Соледар северно од градот Бахмут, кој руските сили се обидуваат да го освојат со месеци, а Пригожин прв објави дека неговите „вагнеровци“ го зазеле Соледар.
Официјален Киев ги негираше овие тврдења и објави дека украинските сили сè уште држат позиции во Соледар. Украинската војска во соопштение соопшти дека „нанела големи човечки загуби“ на руските сили во близина на Бахмут и градот Авдијивка во источна Украина.