Месецот ноември е препознатлив и по одбележување на Светскиот ден на дијабетесот, кој е токму на 14-ти. Во Македонија има околу 120.000 луѓе со дијабетес.
Дијабетесот е болест која се карактеризира со зголемена концентрација на шеќер во крвта и недостаток на инсулин, хормон кој овозможува користење на шеќер внесен во организмот, кој го одржува нивото на шеќер во крвта на оптимално ниво.
Дијабетесот, или шеќерната болест, се нарекува и глобална епидемија бидејќи бројот на болни луѓе во светот расте до нивоа што пред само неколку децении беа незамисливи. Постојат неколку причини за оваа појава, од кои најзначајна е промената на животниот стил која се карактеризира со поголем внес на висококалорична храна и намалена физичка активност.
Постојат многу различни знаци кои може да укажуваат на тоа дека личноста има дијабетес, но еден симптом многу луѓе не го поврзуваат со оваа хронична болест, предупредуваат лекарите. Како што откриваат, станува збор за темни пазуви.
Имено, темните дамки под пазувите, но и на задниот дел од вратот или препоните можат да значат дека има премногу инсулин во крвта. Ова често е знак за преддијабетес, а медицинското име за оваа кожна состојба е Acanthosis nigricans.
Покрај овој необичен симптом, кој често е еден од најраните, други знаци кои предупредуваат на дијабетес вклучуваат зголемена жед, често мокрење, замор, заматен вид, бавно зараснување на раните, намалено чувство и трнење во рацете и нозете.
