Археолозите открија оловен саркофаг и насликани фрагменти од преградата што го дели олтарот од црковниот наос под денешното ниво на подот на катедралата Нотр Дам, а откритието нуди нов увид во историјата на градбата која моментално се реконструира по катастрофалниот пожар во 2019 година.
Во Нотр Дам, катедрала од 12 век, во тек е ископување како превентивна мерка, пред да се постават скелиња потребни за обновување на дрвениот свод на покривот висок 100 метри.
„Во трансептот на катедралата, кај делот што го одвојува светилиштето од остатокот од црквата, откриени се фрагменти со извонреден научен квалитет“, рече француската министерка за култура Розлин Башло, додавајќи дека ископувањата се продолжени до 25 март.
Местото на ископување лежи под камен слој од 18 век, но некои пониски нивоа датираат од 14, а некои дури и од почетокот на 13 век, соопшти Министерството за култура.
„Успеавме да ‘турнеме’ мала камера внатре, која откри остатоци од ткаенина, органска материја како коса и остатоци од растенија“, изјави Кристоф Беснје од Францускиот национален археолошки институт. „Фактот што остатоци од растенијата сè уште се таму укажува дека содржината е многу добро сочувана.“
Археолозите веруваат дека оловниот саркофаг веројатно припаѓал на некој висок достоинственик и претпоставуваат дека би можел да потекнува од 14 век, што, доколку се потврди, би го направило откритието спектакуларно.
Ископувањата открија и јама веднаш под денешното ниво на подот на катедралата, која веројатно била ископана околу 1230 година, кога се градела катедралата Нотр Дам, еден од најстарите примероци на француската готика.
Други делови од градбата, уништени во почетокот на 18 век, биле откриени за време на реставрацијата на Нотр Дам во средината на 19 век и веќе се изложени во музејот Лувр.
Пожарот што ја зафати речиси целата Нотр Дам во 2019 година ја шокираше Франција и светот. Расплаканите парижани и зачудените туристи потоа со неверување гледаа како пожарот ги зафати кулите на една од најпознатите цркви во светот.