Кошаркарите на САД вчера во првото коло на олимпискиот турнир ја совладаа Србија со убедливи 110:84, во чии редови брилјираше Никола Јокиќ.

Јокиќ постигна 20 поени со 5 скока и 8 асистенции, но една нереална статистика покажува зошто тој е најдобриот кошаркар во светот и заслужено актуелен МВП на НБА.
Имено, во 31 минута кои ги мина на теренот вкупниот резултат беше 81:81.
Сепак, во деветте минути кога одмараше на клупата, Американците направија предност од 29:3, што доволно покажува колкава разлика прави Јокиќ со своето присуство на теренот, дури и кога игра против најдобриот тим во светот, кој, според сите кошаркарски стручњаци, би требало да прошета до златото во Париз.
Инаку, најдобар кај САД беше Кевин Дурент со 23 поени. Леброн Џејмс додаде 21 поен, додека Џру Холидеј постигна 15. Србија очекувано ја предводеше Никола Јокиќ кој постигна 20 поени, а помогна и Богдан Богдановиќ кој додаде 14 поени.
Јокиќ ќе има нова можност да ја демонстрира својата магија на теренот веќе во среда кога Србија ќе го одигра дуелот од второто коло против Порторико.