Нереални сцени од тајфунот Јаги, кој однесе повеќе од 220 животи во Виетнам

Бројот на загинати од тајфунот Јаги во Виетнам се искачи на 226, а уште 104 лица се водат како исчезнати, соопшти владината агенција за управување со катастрофи.

Невремето, кое е најсилното што ја погодило оваа земја во Југоисточна Азија во последните децении, стигна на копно во саботата со ветрови до 148 километри на час, предизвикувајќи поројни поплави и лизгање на земјиштето.

Официјални лица изјавија дека северната провинција Лао Каи претрпела најголеми жртви, со 98 мртви и 81 исчезнат.

Претходно, виетнамскиот весник VNExpress објави дека повеќе од 800 луѓе се повредени.

Бројот на жртвите го достигна врвот на почетокот на оваа недела кога поплавата го однесе целото село Лан Ну во Лао Каи во вторникот.

Стотици спасувачи тргнаа во потрага по преживеани, но 53 селани исчезнаа во четвртокот наутро, објави VNExpress.

Поплавите во главниот град Ханој, наводно, биле најтешките во последните две децении и доведоа до масовна евакуација.

Вишокот вода од Црвената Река малку се повлекол, но многу области сѐ уште се поплавени.

Беа видени луѓе како минуваат низ матна кафена вода до колена за да се упатат по една улица, некои сè уште носат кациги за велосипеди и мотоцикли откако по пат ги оставија своите возила.

Јаги ослабе во неделата, но врнежите продолжија, а реките останаа опасно високи.

Поплавите и лизгањето на земјиштето предизвикаа најголем дел од смртните случаи, многу од нив во Лао Каи, кој граничи со Кина и е дом на популарната дестинација за планинарење - Сапа.

Во понеделникот, челичен мост се урна во провинцијата Пу То над надојдената Црвена Река, па 10 автомобили и камиони заедно со два мотоцикла паднаа во водата.

Автобус со 20 луѓе исто така беше зафатен во надојдениот поток од лизгање на земјиштето во планинската провинција Као Бан.

Во меѓувреме, во Тајланд најмалку две лица загинаа, а стотици останаа заглавени по обилните дождови кои зафатија две северни провинции, се излеаја реки, поплавија села и предизвикаа лизгање на земјиштето, соопштија властите во средата.

Експертите велат дека бурите како тајфунот Јаги стануваат сѐ посилни поради климатските промени, бидејќи потоплите води на океаните обезбедуваат повеќе енергија за нивно напојување, што доведува до посилни ветрови и пообилни врнежи.