Nestlé Japan Ltd. стана првата компанија во светот која го комерцијализираше новооткриеното природно розово чоколадо преку лансирањето на розов KitKat.
Во септември минатата година, познатиот произведувач на чоколадо Barry Callebaut го произведе првото розово чоколадо, што е голема револуција во чоколадната индустрија бидејќи ова е првпат по 1930 година да биде измислен нов начин да се произведува чоколадо. Претходно постоеја само млечното, црното и белото чоколадо.
Розовиот KitKat е произведен во ограничен број и ќе почне со продажба од утре во специјализираните продажни места на Nestlé низ Јапонија и Европа, онлајн и во околу 80 други продавници низ Јапонија.
Чоколадото ќе биде рекламирано како совршен подарок за партнерот или партнерката во очекување на Денот на вљубените.
„Презадоволен сум што нашето откритие почна да се појавува на пазарот толку брзо преку партнерството со Nestlé и нивниот бренд KitKat во Јапонија“, рече Антоан де Сент-Африк, извршниот директор на Barry Callebaut.
Розовото чоколадо е природно произведено, без да му се додава вештачка боја или вкус, нема додатни адитиви и има овошен, силен вкус.
Покрај воведувањето на розово чоколадо во каталогот на компанијата, Nestlé се подготвува и да го скрати количеството на шеќер од нивните производи. Во март минатата година тие најавија дека почнувајќи од 2018 година планираат да исфрлат околу 7.500 тони шеќер од нивните производи на годишно ниво.