Македонскиот голгетер е презадоволен по постогнатиот гол во неделата со кој му донесе голема победа на својот тим во борбата за опстанок во Серија А.
Илија Несторовски ја реши Фиорентина. Вака горе-доле пишуваат сите италијснаки медиуми откако Македонецот во неделата во 86.тата минута од натпреварот во Удине со глава ја затресе гостинската мрежа за победа на Удинезе од 1:0.
Со овие три бода неговиот тим има 28 бодови и е на делба на 11. место со Болоња. Удинезе има 10 бодови повеќе од последниот тим кој е во опасната зона, Каљари.
„Освоивме три бода против Фиорентина. Знаевме дека овој натпревар е многу важен за нас бидејќи со оваа победа продолжуваме да напредуваме на табелата. Не смее да гледаме кон долниот дел, со овие бодови направивме убав скок нагоре. Ни недостасуваат 12 поени за да ја исполниме нашата цел и се надевам дека што е можно поскоро ќе ги собереме“, рече Иле.
Сезонава ретко добива шанса да игра од првата минута, а овој пат дури и ги одогра комплетните 90 минути. Во неговиот тим има доста повредени играчи, па нашиот репрезентативец одлично си ја искористи шансата.
(голот е на 3:10)
„Секогаш кога има нешто што ни недостасува, кога ни фалат неколкумина играчи, мораме да дадеме сѐ од себе. Кон крајот видовме што се случи, бевме добри, победивме, освоивме три бода и навистина сум задоволен за целиот тим, за сите играчи кои играме малку, а сега добивме шанса“.
Несторовски сезонава ретко ги тресе противничките мрежи, што секако е и поради фактот што не добива доволно шанса. Но, двата гола кои ги постигна оваа сезона беа голови за победа, па вкупно 6 бода му донесе на Удинезе сезонава, што е важно во борбата за опстанок. Покрај Фиоретина, претходно му даде гол и на Торино кога при резултат од 2:2 погоди за 2:3 и победа.
„Мене головите ми се многу важни. Конечно сега погодив и му донесов три бода на тимот. Ми се допаѓа кога сум стартер, ми се допаѓа кога му помагам на тимот, на моите соиграчи и конечно после толку време се случи да помогнам со мој гол за да се освојат три бода“, заврши популарниот НестоГол.
Следниот натпревар на Удинезе е утревечер против Милан, а Несторовски повторно очекува да добие шанса.
