Патник на лет на „Рајанер“ од Лондон до Малага немал веќе трпение да седи во авионот откако леталото стоело на писта половина час по слетувањето и патниците чекале дозвола да почнат да се симнуваат.
Мажот, чиј идентитет не беше објавен, е снимен како излегува од вратата за итен излез и стои на крилото на авионот, а потоа и си седнува.
Снимката за кратко време заврши на социјалните мрежи, а потоа и на светските медиуми.
Патникот сакал да излезе од авионот на своја одговорност и тврдел дека има напад на астма дека итно му треба свеж воздух. Откако поседил на крилото на авионот, се вратил внатре, си го зел багажот и излегол како и сите други патници.
Откако сите регуларно се симнале од авионот, патникот морал да се оправда и пред шпанската полиција.
„Беше одведен на распит бидејќи ги прекрши правилата за безбедност, но сѐ е решено со шпанските власти“, соопшти „Рајанер“.
