Netflix ја обнови хит серијата Emily in Paris за петта сезона.
Стриминг гигантот ја сподели веста преку објава на Instagram во која се гледа како ѕвездата на серијата Лили Колинс пие кафе од шолја на која пишува Emily in Paris, а на дното се гледа бројот 5, па вели: „Еден е Рим“.
Првиот дел од четвртата сезона на Emily in Paris пристигна на 15 август годинава, а вториот излезе на 12 септември.
ПРЕДУПРЕДУВАЊЕ Текстот понатаму содржи спојлери! Доколку сè уште не сакате да ги знаете деталите од новата сезона на Emily in Paris, не читајте понатаму.
Во новата сезона, Емили привремено го напушти Париз и ја посети Италија за нова деловна можност. За време на божиќните празници, на скијање на Алпите, младата Американка го запознава италијанскиот бизнисмен Марчело Муратори (Еугенио Франческини). Иако конечно има шанса да биде со Габриел (Лукас Браво), бившиот партнер на нејзината пријателка Камиј (Камиј Разат), шармантниот Италијанец полека го освојува нејзиното срце.
Покрај потенцијалната врска со Марчело, чие семејство се занимава со производство на кашмир, Емили се воздржува и поради работните обврски во Италија бидејќи нејзината шефица Силви (Филипин Лерој-Болие) сака да започне да работи со семејството Муратори.
Во четвртата сезона имавме можност да ја запознаеме и Женевјев (Талија Бесон), 21-годишната ќерка на сопругот на Силви, која од Њујорк доаѓа во Европа затоа што сака да се занимава со мода. Покрај тоа што флертува со Габриел, Женевјев се обидува и да ѝ ја узурпира позицијата на Емили во компанијата.
Во актерската екипа на серијата се и Ешли Парк, Лисјен Лависконт, Семјуел Арнолд, Бруно Гуери и Вилијам Абади.
Според Variety, четвртата сезона на серијата Emily in Paris брзо стана број еден на листата на најгледани серии на Netflix, а исто така собра 19,9 милиони прегледи во првите четири дена од објавувањето.
Романтично-хумористичната серија веќе четири недели е на врвот на топ листите.
Креатор на Emily in Paris е Дарен Стар (Sex and the City), а серијата е продуцирана од MTV Entertainment Studios, Darren Star Productions и Jax Media.
