Филм & ТВ

Netflix ја избриша сцената со самоубиството во серијата „13 Reasons Why“

16. јули 2019 - 14:06 | А.С.

Контроверзната сцена во драмата на Netflix „13 Reasons Why“ во која тинејџерка се самоубива, е отстранета и не се емитува во верзијата достапна сега на стриминг платформата, две години по објавувањето.

Од Netflix велат дека одлуката да се отстрани сцената била донесена „по консултација со медицински експерти“.

Во првичната верзија на епизодата имаше јасен и недвосмилен приказ на самоубиството на Хана (ликот што го игра Кетрин Ленгфорд).

Во верзијата што се емитува сега е отстранета триминутната сцена и се прикажува директно сцената во кое се открива нејзиното тело.

Советувалиштето Samaritans соопшти дека ја поздравува одлуката на Netflix и дека соработува со тимот на стриминг платформата за „давање совети за безбедно прикажување на сцени со самоубиство“.

„Иако опфаќањето на тешки теми во драмските серии може да помогне во насока на тоа луѓето да побараат помош, многу е важно тоа да се направи на одговорен начин“, рече Лорна Фрејзер од Samaritans.

Од Netflix велат дека „будно ја следат дебатата во врска со серијата“, чија трета сезона треба да излезе годинава.

Кога се појави во 2017 година, серијата „13 Reasons Why“ доби пофалби за кревање на свеста за теми како силување, малтретирање, врсничко насилство и самоповредување.

Меѓутоа, се појави загриженост дека исто така го глорифицира самоубиството и дека непотребно детално било прикажано самоубиството на Хана.

Коментирај