Стриминг гигантот Netflix одбива да го отстрани полскиот еротски филм „365 Days“ од својот репертоар, иако не престануваат жестоките критики за содржината на филмот.
Исто така почната е петиција на Change.org во која се наведува дека филмот „го промовира глорифицирањето на културата на силување, го олеснува и тривијализира насилството врз жените и трговијата со луѓе“.
Полската еротска драма е најгледаната содржина на популарниот стриминг сервис. Филмот што некои критичари го квалификуваа како „меко порно“, е приказна за млада жена која е заробена и „има една година“ да се заљуби во шефот на сицилијанската мафија кој ја опсипува со подароци, ја носи на патувања и се обидува да ја освои.
Многу јавни личности гласно зборуваат за штетното влијание на филмот, а една од најжестоките поборнички е велшката пејачка Дафи која напиша отворено писмо до Netflix, осудувајќи го прикажувањето на филмот како „немарно и опасно“.
„Многу ме растажува фактот дека Netflix им дава платформа на ваквите ‘филмови’ кои го претставуваат киднапирањето како нешто еротско, а сексуалното насилство и трговијата со луѓе погрешно ги прикажуваат како ‘секси филм’“, напиша Дафи во писмото и додава жртвите на трговија со луѓе најчесто се невидливи и сега нивното патење се прикажува како „еротска драма“.
Филмот „365 Days“ е базиран на првиот роман од истоимената трилогија на Бланка Липињска и имаше премиера во кината во Полска на 7 февруари годинава. Netflix го откупи филмот и го стави во својот репертоар кон средината на јуни, од кога почна да привлекува огромно внимание.
Netflix не ги коментира критиките за филмот и засега одбива да го тргне од платформата.