Неуништливиот Новак Ѓоковиќ (37) денеска во четвртфиналето на Австралија опен го совлада 16 години помладиот Карлос Алкарас и по маестрален пресврт оствари победа во спектакуларен меч. Беше 3:1 во сетови.
Така, Ѓоковиќ славеше во финалето пред финалето и направи голем чекор кон титулата на првиот Грен слем турнир во сезоната, а во полуфиналето пречка ќе му биде Германецот Александер Зверев.
Ѓоковиќ направи брејк на стартот од денешниот натпревар и поведе со 2:0, но веднаш возврати Алкарас, кој потоа направи пресврт.
Србинот почна да греши и тоа на најдобар начин го искористи Шпанецот, кој го доби првиот сет со пресврт. Клучниот брејк го направи во деветтиот гем, а потоа го потврди за 6:4 и водство.
Слично како и првиот, започна и вториот сет, бидејќи Ѓоковиќ повторно направи брејк, а потоа дојде до големи 3:0, но Алкарас брзо одговори.
Потоа играчите го чуваа својот сервис, па Ѓоковиќ направи брејк во клучен момент. Алкарас сервираше на 5:4 за да остане во сетот, а токму тогаш Ѓоковиќ брејкуваше и го доби сетот со 6:4.
Гледавме спектакуларен тенис и во третиот сет, и двајцата тенисери одиграа брилијантно, но Алкарас се извлече бидејќи спаси бројни брејк топки. Сепак, киксна во шестиот гем и потоа Ѓоковиќ стигна до 4:2, по што го приведе сетот до крај и победи со 6:3 за целосен пресврт.
Ѓоковиќ направи брејк на почетокот од четвртиот сет и го трасираше патот до победата, која на крајот ја оствари со 6:4 во решавачкиот сет.
За место во другата полуфинална пресметка утре ќе се борат Американецот Бен Шелтон против изненадувањето Лоренцо Сонего (55-ти на АТП) и Јаник Синер против домашниот Алекс Де Минор.
