Европската Унија побара од Обединетото Кралство да се откаже од предлог-законот за поништување на резултатите од четиригодишните разговори за Брегзит, но британската Влада на премиерот Борис Џонсон не го прифати тоа барање.
Европската комисија соопшти дека започнува подготовки за нерегулирано излегување на Обединетото Кралство од ЕУ, оценувајќи дека Лондон „крајно сериозно ќе го прекрши“ минатогодишниот договор доколку го усвои предложениот владин закон.
По итните разговори меѓу потпретседателот на Комисијата, Марош Шефковиќ и британскиот преговарач за Брегзит, Мајкл Гоув, вчера во Лондон, ЕУ соопшти дека британскиот нацрт-закон „сериозно ја нарушува довербата“ и дека Лондон сега мора да преземе чекори за нејзино враќање.
Гоув рече дека го отфрлил барањето на ЕУ за повлекување на нацрт-законот.
– Му реков на потпретседателот Шефковиќ дека не можеме и нема да го направиме тоа, рече Гоув.
Официјални претставници на ЕУ и дипломати велат дека Унијата ќе преземе правни активности против Лондон, но, како што пренесуваат британските медиуми, тоа веројатно нема да биде преземено пред крајот на годината, кога истекува рокот за целосно излегување на Обединетото Кралство од Унијата по преодниот период.
Британската Влада соопшти дека е посветена на договорот со ЕУ и дека целта на предложениот закон е само да разјасни некои нејаснотии. Неговата главна цел е да го зачува Мировниот договор во Северна Ирска од 1998 година, со кој се стави крај на децениското насилство.
Лидерите на ЕУ порачаа дека нерегулираното прекинување на односите со Обединетото Кралство ќе предизвика хаос во снабдувањето во Европа и на глобалните финансиски пазари.
Главниот преговарач на ЕУ, Мишел Барние, кој имаше одделни разговори со Шефковиќ во Лондон, го критикуваше пристапот на Обединетото Кралство кон преговорите и посочи дека сè уште има големи разлики.
– Обединетото Кралство не се ангажираше на ист начин врз основа на принципите и интересите на ЕУ, рече Барние.
Тој додаде дека ЕУ работи напорно да биде подготвена за сите сценарија на 1 јануари 2021 година, кога истекува рокот за конечно излегување на Обединетото Кралство, вклучувајќи го и оној за постигнување решение без договор.
Без трговски договор, ќе биде доведена во прашање размената меѓу Обединетото Кралство и другите земји на ЕУ, која изнесува илјадници милијарди долари, во услови на криза што ја предизвика пандемијата на коронавирусот.
