Баерн изминативе денови има многу причини за славење, особено по завчерашната победа над Борусија, а администраторите на социјалните мрежи за клубот секогаш се расположени за анимирање на верните фанови со нови и интересни информации.
На официјалниот Twitter профил на клубот беа објавени две фотографии со германскиот играч за врска Леон Горецка.
На првата Горецка е прилично слаб, а на втората се гледа дека го искористил времето поминато во изолација да вежба и значително да ги развие мускулите на телото.
„Оваа трансформација на Леон Горецка“, стои во објавата под хаштаг #HULKretzka, алудирајќи на познатиот стрип јунак Хулк.
„Го искористив времето во изолација да поработам на зголемување на кондицијата и силата. Покрај видеотренинзите со екипата вежбав и самоиницијативно“, изјави неодамна 25-годишниот Горецка за германските медиуми.
Горецка дојде во Баерн пред две години како слободен играч од Шалке. Сезонава за Баварците одигра 26 натпревари во сите натпреварувања. Постигна 5 голови и запиша 7 асистенции.