Големо внимание на интернет предизвикаа објавени фотографии од трансформацијата на изгледот на 40-годишен спортист кој бил во кома 25 дена откако се покажал позитивен на коронавирусот.
Кога пристигнал во болница Ахмед Ајад бил висок 185 см и тежок 97 килограми, со оформени мускули. Кога излегол од болницата „Џон Хопкинс“ имал 27 килограми помалку.
„Кога се разбудив од кома имав 70 килограми, рацете и нозете ми беа тенки. Не можев да поверувам колку ми беше тешко да станам од креветот“, раскажа тој во интервју објавено на интернет страницата на болницата.
Пред да заболи од COVID-19, овој спортист дигал тегови и играл кошарка. Кога не вежбал, работел во семејната фабрика за мебел. Првите симптоми ги почувствувал на 11 март, неколку дена откако се вратил од Флорида. Се обидел да закрепне во домашни услови, но симптомите не поминувале. Три дена подоцна почнал да губи здив и не можел сам да се одвезе во болница. Негов пријател му помогнал за превозот, а во болницата утврдиле дека има грип и дека е заразен со коронавирусот, пишува CNN. Тој е првиот пациент во таа болница приклучен на респиратор.
Со блиските контактирал пишувајќи пораки на хартија бидејќи не можел да зборува. Набргу завршил во кома, мајка му не можела да поверува дека не смее да го посетува. Неколку дена откако бил тргнат од респиратор го префрлиле на интензивна нега во одделението за борба со коронавирусот. Од болница е пуштен на 22 април, со оштетени бели дробови и срце.
„Закрепнувам од ден на ден, ја враќам тежината од претходно, јадам многу и одам на прошетки“, додава тој во интервјуто.
Според него, борбата со вирусот била една од најтешките работи кои ги надминал во животот.
„Луѓето се однесуваат како да не постои болеста, но не е така. Носете заштитни маски, не се собирајте во големи групи. Грижете се за себе и за луѓето околу вас, сфатете го ова сериозно. Не е шега, може да ве убие, дури и кога мислите дека сте силни и здрави. Не сте имуни“, вели тој за CNN и се надева дека другите нема да го имаат неговото искуство со COVID-19.