Фудбалерот на Баерн, Алфонсо Дејвис мина низ огромна физичка трансформација за само две години минати во овој германски клуб. Денес, тој е крилен играч кој може да игра во одбрана и во напад, а изгледа фантастично и сигурно ќе биде голем предизвик за сите противници во следната сезона.
Канадскиот играч Алфонсо пристигна во кампот на Баерн кон крајот на 2018 година и тогаш ги запозна новите соиграчи. За екипата од Минхен почна да игра во јануари, 2019 година.
Уште на почетокот од кариерата во Баерн ги одушеви сите поради неверојатната брзина што ја поседува.
Дејвис е роден на 2 ноември 2000 година во бегалски камп во Гана, каде се сместиле неговите родители кога побегнале од Либерија.
„Беше многу тешко да живеете во нашата земја бидејќи единствениот начин да преживеете е носење оружје. Ние не сакавме да носиме оружје, ниту да пукаме од него, па одлучивме да избегаме“, објасни Дебеа, таткото на Алфонсо.
Неговото семејство било меѓу 450.000 луѓе кои ја напуштиле Либерија. Алфонсо првите пет години од животот ги минал во многу тешки услови во бегалски камп, а потоа Канада го прифатила нивното барање за азил. Се преселиле во градот Виндзор, за подоцна да се преселат во Едмонтон каде и почнал да игра фудбал.