Минхенски Баерн не одговорил на пратениот и-меил за ослободување на Ерик Шупо-Мотинг кој требаше да настапи за Камерун, а подоцна се утврди дека мејлот наместо кај баварскиот клуб бил пратен на погрешно место.
Едноставен меил го чини најдобриот камерунски фудбалер пауза од репрезентацијата. Фудбалската федерација на Камерун испратила и-меил во кој бара од Баерн да му дозволи на играчот да ѝ се приклучи на репрезентацијата, но одговор никогаш не добила.
Без разлика дали клубот ќе дозволи или не, мора тоа да го направи со праќање на одговор. Откако селекторот Тони Консејсаун, кој е португалски стратег, јавно се пожалил дека Баерн го игнорира барањето за ослободување на камерунската ѕвезда, Германците, зачудени, испратиле и-меил до ФЦФ во кој објаснуваат дека играчот не можат да го ослободат бидејќи барање за негово ослободување никогаш не добиле.
Она што на прв поглед за Камерунците делувало како изговор на Баерн да не го пушти играчот, подоцна било востановено дека е поради нивна вина.
Имено, човекот задолжен за електронска пошта во ФЦФ, наместо до германскиот гигант барањето го испратил на погрешна адреса, односно го пратил назад до ФЦФ.
„Навистина ми е жал што дојде до лоша комуникација со барањето. Едвај чекав да играм за репрезентацијата“, вели Шупо-Мотинг.
Камерун на 26 и 30 март игра против Зелен 'Рт и Руанда во рамките на квалификациите за пласман на Африканскиот куп на нации. Тоа се последни две кола, а „Нескротливите лавови“ секако се пласирани на завршницата бидејќи се домаќини.
„Како и да е, ѝ посакувам на репрезентацијата сѐ најдобро во квалификациите и едвај чекам повторно да бидам викнам за следните натпревари во септември“, заврши играчот на Баерн.
32-годишниот Шупо-Мотинг има 55 натпревари за Камерун и 15 голови. Роден е во Хамбург од татко Камерунец и мајка Германка, па прво настапуваше за младинските репрезентации на Германија пред да одлучи да направи промена. На пријателската во 2014 во Австрија ѝ даде гол на Македонија во победата од 2:0.