Невиден хаос на Копа Америка: Дарвин Нуњес се тепаше со навивачите, со столче отиде на трибина

Во ноќта зад нас се одигра второто полуфинале на Копа Америка во кое Колумбија го совлада Уругвај со 1:0, а натпреварот имаше и трето полувреме кое го одбележаа неверојатни сцени со тепачки.

Колумбијците дојдоа на чекор од својот сон и освојување на титулата континентален шампион на овогодинешното издание на Копа Америка, која досега ја одиграа на перфектен начин. Од првото коло до полуфиналето одиграа одлични партии, а ноќеска го елиминираа и одличниот Уругвај.

Стрелец на единствениот гол на натпреварот во 39. минута беше играчот од средниот ред Хеферсон Лерма, а вреди да се напомене дека Колумбијците цело второ полувреме играа со играч помалку бидејќи беше исклучен Даниел Муњос. Сепак, тоа на крајот не ги чинеше пласман во финалето.

Меѓутоа, дуелот ќе остане запаметен по грозоморните сцени по натпреварот. Уругвајските и колумбиските навивачи се судрија на трибините, а им се придружи и фудбалерот на Ливерпул, голгетерот Дарвин Нуњес.

Иако важи за една од најголемите и најскапите ѕвезди на јужноамериканскиот фудбал, на Нуњес не му беше проблем да се качи на трибините и да им се придружи на уругвајските навивачи во пресметката со Колумбијците. Во еден момент е снимен како со столче оди кон навивачите, а уpаtи и неколку удари со тупаници.

Вреди да се нагласи дека во тепачката со Колумбијците учествуваа и други уругвајски фудбалери, но Дарвин беше најагресивен и единствен подготвен за борба која дефинитивно не му доликува на еден професионален фудбалер.

Инаку, Колумбија во финалето ќе игра против фаворизираната Аргентина, која во второто полуфинале беше подобра од Канада.

Останува да видиме каква одлука ќе донесе КОНМЕБОЛ, со оглед на тоа што, за разлика од ЕУРО, на Копа Америка има и натпревар за 3. место, а токму Уругвај ќе игра на него против Канада ноќта од сабота кон недела (2:00 ч.). Нуњес речиси сигурно го очекува суспензија, веројатно и сите уругвајски играчи што се качија на трибините да делат правда.