Невиден подвиг: Кина зеде примероци од темната страна на Месечината

Кинеската лунарна сонда Chang'e-6 успешно се симна од површината на Месечината и собра индиции за кои научниците очекуваат дека ќе помогнат да се одговори на клучните прашања за раната еволуција на Сончевиот Систем, соопшти кинеската вселенска агенција.

Тоа е нова фаза во амбициозната вселенска програма на Кина, која сака да испрати човечки екипаж на Месечината до 2030 година.

Chang'e-6, именувана по митската кинеска божица на Месечината, беше лансирана на 3 мај од јужната кинеска островска провинција Хаинан, а целосно роботската сонда слета на претходно неистражена локација во огромен ударен кратер наречен басен Јужен Пол - Аиткен на далечната страна на Месечината.

„Модулот на кинеската сондата Chang'e-6 се симна од површината на Месечината во вторникот наутро, носејќи примероци собрани на далечната страна на Месечината, што е невиден подвиг во историјата на човечкото истражување на Месечината“, објави официјалната новинска агенција Xinhua, цитирајќи ја вселенската агенција.

„Мисијата го издржа тестот за висока температура на темната страна на Месечината. По успешното собирање примероци, кинеското знаме за прв пат беше поставено на далечната страна на Месечината“, објави Xinhua.

Научниците веруваат дека темната страна на Месечината, ретко истражена област наречена затоа што е невидлива од Земјата, а не затоа што никогаш не ги фаќа сончевите зраци, е многу ветувачка за истражување бидејќи нејзините кратери се помалку покриени со стари текови на лава од оние на видливата страна.

Примероците земени од другата страна би можеле да ни помогнат да дознаеме повеќе за формирањето и историјата на природниот сателит на Земјата.

Тие, исто така, ќе овозможат подобро разбирање за „потеклото на Сончевиот Систем“ и подобра подготовка за идните истражувања, рече портпаролот на мисијата Chang'e-6, Ге Пинг, цитиран од новинската агенција Xinhua.

Сондите би требало да останат во орбитата на Месечината уште неколку недели, а потоа да почнат да се враќаат на Земјата, каде би требало да слетаат околу 25 јуни. Кина се надева дека ќе ја лансира својата прва мисија со екипаж на Месечината до 2030 година. Таа, исто така, планира да изгради лунарна база.