„Црвените ѓаволи“ почнаа да попуштаат во борбата за титулата во Премиер лигата и тоа најмногу поради грешки во дефанзивата.
Поранешниот десен бек на тимот, Гари Невил, кој сега е стручен коментатор во Sky Sports, е убеден дека доколку Манчестер Јунајтед ја засили одбраната за време на летниот преоден рок, наредната сезона ќе се бори за титулата до крај.
Сезонава никој и не очекуваше од „Црвените ѓаволи“ да бидат таму горе, до пред некое коло дури и лидери, но одличните игри и пред сѐ тактиката на Оле Гунар Солскјер си го направија своето.
Лидерската позиција ги натера навивачите да веруваат дека чудо ќе се случи сезонава и Јунајтед прв пат по осум години ќе ја освои титулата. Сепак, брзо стигна враќањето во реалноста.
„Манчестер Јунајтед едноставно не е баш спремен за борба за титулата. Нешто недостасува, не делува како што треба“, смета Невил.
„Но, мислам дека се на прав пат. Очекувам да бидат конкурентни наредната сезона. Очекувам да донесат нов централен дефанзивец, можеби и нов латерален бек. Голманската позиција е дефинитивно една од оние точки кои треба внимателно да се разгледа“.
Синоќа Јунајтед одигра 3:3 со Евертон, а блед настап имаше голманот Давид де Хеа кој е на мета поради првиот и третиот гол на гостите.
„Би било интересно да се разгледаат опциите за десно крило, а за напаѓач ќе зависи од тоа како Гринвуд ќе се вклопи до крајот на сезоната“, ја заврши својата анализа поранешниот „ѓавол“.
Јунајтед беше лидер точно на половина од сезоната, согласно 19. коло, но сега по 23. коло е втор со 5 бодови заостанување зад градскиот ривал Манчестер Сити, кој има и натпревар помалку.