Невреме ја зафати Италија: Поплави во Милано, водата носи мостови

Бран обилни врнежи ја погоди северна Италија.

Поплавен е финансискиот центар на Милано, а во регионот Пиемонт се трага по исчезнатиот тракторист.

58-годишниот Џовани Канавера утрово го движел својот трактор по брегот на реката Орко, но земјата попуштила и тој и тракторот завршиле во матната вода. Малку по 18 часот тракторот е извлечен, но трага од мажот сè уште нема. Се претпоставува дека го однела силна речна струја, а во потрагата бил вклучен и хеликоптер.

Уште една река се излеа во долината Суза во Пиемонт, урна два моста, блокирајќи го патот и изолирајќи околу 50 луѓе во две села. Два други северни региони, Ломбардија и Венето, исто така се соочуваат со поплави.

Невремето предизвика голема материјална штета и прекин во градот Милано каде се излеаа реките Севесо и Ламбро. Пожарникарите во Милано соопштија дека одговориле на десетици повици за спасување на луѓето заглавени во автомобили во поплавените подвозници и отстранување на водата од подрумите.

Некои услуги на метрото мораа да бидат прекинати поради поплави. За прв пат од основањето во 1976 година, радио станицата Radio Popolare престана да емитува програма бидејќи нејзиниот центар за емитување беше преплавен со вода.

Инаку, јужна Италија изминативе неколку недели се справува со суша, која предизвика големи проблеми за локалното земјоделство и туризам, особено на островите Сицилија и Сардинија.