Незапирливиот Кејн: Им даде гол на сите 17 бундеслигаши против кои играше

Изминатиов викенд фудбалерите на Баерн го совладаа Фрајбург на домашен терен (2:0), а овој натпревар го одбележа најдобриот стрелец на баварскиот тим – Хари Кејн.

Имено, капитенот на репрезентацијата на Англија пред средбата доби награда за феноменалната дебитантска сезона која ја имаше во дресот на германскиот великан.

Еден од најдобрите голгетери на денешницата минатата натпреварувачка година за клубот од „Алианц Арена“ одигра 45 натпревари и постигна 44 голови, а 12 пати им асистираше на соиграчите.

А, колку е одличен играч, Англичанецот докажа и на мечот против Фрајбург, каде го постигна првиот гол за својата екипа, додуша од пенал, и постигна извонреден успех.

За што се работи?

Хари Кејн со својот гол против Фрајбург успеа да се запише во листата на стрелци против секоја од 17-те екипи против кои играше во Бундеслигата и со тоа покажа дека е вистинска гол-машина.