Францускиот играч од средниот ред на Челзи, Нголо Канте, го пропушти неделниот меч против Манчестер Сити поради тоа што докторите на тимот биле загрижени за неговата здравствена состојба, откако тој се онесвестил во соблекувалната.
Веднаш по тренингот кој во петокот го извршил тимот на Челзи, Нголо Канте отишол во соблекувалната и таму за момент изгубил свест.
Медицинскиот тим на Челзи тврди дека потоа му биле извршени кардиолошки тестови и откако не успеале да пронајдат никаква нерегуларност, тие му дале дозвола да игра против Манчестер Сити. Сепак, играчот не се чувствувал добро во неделата, па затоа не се појави на теренот против лидерот на табелата, кој неговиот тим го изгуби со резултат 1:0.
Во екот на веста за смртта на Давиде Астори, играчите на Челзи беа потресени дека истото би можело да се случи на било кој од нив. Астори играше под менаџерската палка на Антонио Конте додека тој беше селектор на репрезентацијата на Италија.
Нголо Канте доби дозвола од медицинскиот тим на Челзи да се најде во составот за претстојните натпревари, најпрво против Кристал Палас во сабота, па потоа и во Лигата на шампионите против Барселона наредната недела.
Иако трката за четвртото место во Премиер лигата, кое води во ЛШ наредната сезона, изгледа исклучително тешка, сепак сите играчи велат дека и понатаму ништо не е изгубено и дека ќе продолжат да се борат до крајот на сезоната.
