Лионел Меси постигна два прекрасни гола, а Аргентина ја продолжи серијата без пораз на 35 натпревари со победата од 3:0 против Јамајка на подготвителниот натпревар за Светското првенство.
Хулијан Алварез ѝ донесе водство на Аргентина во 13. минута, а Меси заокружи сè со головите од 86. и 89. минута. Тој во игра влезе во 56. минута со овации од стадионот во Харисон.
За многумина најдобриот фудбалер на сите времиња го постигна првиот гол со удар од 20 метри по акција со Џовани Ло Селсо, а потоа три минути подоцна, по прекршокот над него од страна на Адријан Маријапа, постигна гол од слободен удар.
Натпреварот се одигра во Ред Бул Арената пред околу 25.000 гледачи кои најмногу ја бодреа Аргентина, со што се создаде впечаток на домашен натпревар. Посебно се скандираше Меси, чиј учинок сега изнесува 90 гола и 51 асистенција на 164 одиграни натпревари за националниот тим.
Од поразот од Бразил на Копа Америка на 2 јули 2019 година, Аргентина одигра 35 натпревари. Во нив таа оствари 25 победи од кои една по пенали и 10 нерешени.