До скоро, сите западни сили се противеа на идејата за исцртување на нови граници на Балканот, а потоа се појави Трамп, пишува во текстот на BuzzFeed News со наслов „Страста на Трамп за ризични зделки ги дестабилизира границите во Западен Балкан“.
Во текстот на новинарот Алберто Нардели се вели дека европските лидери се многу загрижени за можна дестабилизација на Западен Балкан поради Косово. Сите големи членки на ЕУ се противат на какво било менување на границите на Балканот, а до скоро таков став имаа и САД.
Потоа се појави Доналд Трамп и неговата дипломатија „тргаме раце“ остави простор за нови разговори за промена на границите.
Повикувајќи се на два дипломатски извори, во текстот се тврди дека има еден, неофицијален план што би го поддржала и Србија - северниот дел на Косово во кој главно живеат Срби да се припои кон Србија, а за возврат Косово да го добие јужниот дел на покраината во кој живеат етнички Албанци.
Меѓутоа, таквиот план не им се допаѓа на европските влади кои се плашат дека со прекројување на етничките граници на Балканот би се дестабилизирал целиот регион што пред само 25 години беше соочен со најголемата војна на европско тло по Втората светска војна.
Еден француски дипломат тврди дека самото спомнување на измена на границите има дестабилизирачки ефект.
„Границите се лесно запаливи. Едноставно не може да знаете што ќе се случи ако ги допрете“, вели францускиот извор за BuzzFeed News.
Сега администрацијата на Трамп усвојува порелаксиран пристап кон меѓународните прашања, по принципот „другите сами нека си ги решаваат своите проблеми“.
Еден западен дипломат за Балкан смета дека е „малку веројатно“ дека администрацијата на Трамп активно ја поддржува идејата за размена или поделба на територии, додека друг вели дека неговите американски колеги никогаш отворено не рекле дека се сложуваат со такво решение кога тоа се барало од нив.
Меѓутоа, она што најмногу ги вознемирува долгогодишните набљудувачи на ситуацијата на Балканот не е Америка и дали таа активно ја поддржува идејата или не, туку недостигот на јасна позиција на САД и чувството дека администрацијата на Трамп седнува во „задните редови“ кога се дискутира за регионот.
Германската канцеларка Ангела Меркел изјави дека „на Балканот нема да има промени на границите и се чини дека тоа мора постојано да го повторуваме.“
