Американската астронаутка Никол Мен (45) стана првата домородна Американка која отпатува во вселената.
Мен е дел од четиричлениот екипаж кој отпатува до Меѓународната вселенска станица, а ракетата Фалкон 9 на SpaceX лансирана од Флорида.
Астронаутката за BBC пред патувањето изјави дека се надева дека мисијата ќе ги инспирира идните генерации домородни Американци да ги следат нивните соништа.
Таа е припадник на племето Ваилацки, а во текот на нејзината кариера има акумулирано големо искуство со летање со различни авиони на американските маринци. Добитничка е на шест службени медали и служела во Ирак и Авганистан. Таа ја заврши обуката за астронаути во 2015 година и оттогаш ја чека својата шанса да патува во вселената. Таа претходно беше наведена за патување со капсулата Starliner на Boeing, но имаше одложувања, па НАСА ја префрли во мисијата Crew 5.
Екипажот на мисијата Crew 5 барем привремено ќе го зголеми бројот на луѓе на МВС на 14.
Астронаутот Џон Касада, Јапонецот Коичи Вакта и руската космонаутка Ана Кикина отпатуваа со Мен до МВС.
Кикина е единствената жена меѓу руските космонаути, а нејзиното присуство претставува продолжување на договорот меѓу Русија и САД. Двете земји ветија дека ќе испратат екипажи во орбитата и покрај тензиите околу руската инвазија на Украина.
Мен, Касада и Кикина никогаш претходно не биле во вселената, додека Вакта е искусен и веќе четири пати патувал во вселената.
Crew 5 ќе помине шест месеци на МВС, додека Crew 4 се враќа дома на 12 октомври.