Ако го прашате Нил ДеГрас Тајсон што мисли за тоа дали Земјата е рамна, прво ќе ви даде еден прекорен поглед, а потоа ќе објасни зошто и понатаму постојат луѓе што мислат дека Земјата е рамна и дека е центар на вселената.
Во еден разговор со Huffington Post, Тајсон го поврза нивото на логика и размислување на оние што веруваат дека Земјата е рамна со она на децата.
„Кога сте мал, мислите дека сите ве знаат и дека сте центар на својата вселена. Создревањето не е лесно, не само како луѓе, туку и како цивилизација“ - вели Тајсон.
Иако во минатото луѓето мислеле дека Земјата е рамна, бидејќи можеле да ја гледаат од ограничена перспектива, денеска имаме многу докази дека нашата планета е округла. Еден од доказите се и фотографиите направени од Aplollo програмата.
Поголемиот дел од човештвото го надмина незрелиот поглед на вселената што го имале нашите предци, но некои се уште заостануваат.
На почетокот на годината, Тајсон влезе во Twitter расправија со раперот B.o.B. кој тврдеше дека земјата е рамна.
„Не ми смета кога луѓето нешто не знаат. Но ако не знаете, а имате влијание на други луѓе, тоа може да биде многу опасно“ - смета научникот.
Тој вели дека за таквата ситуација се криви училиштата и образованието.
„За ваквата ситуација го обвинувам образовниот систем што дозволува да матурираат личности кои не знаат да направат разлика што е вистина, а што лага“ - вели Тајсон.