Иако до крајот на фудбалската сезона има уште два месеци, сепак најголемите европски клубови веќе се во потрага по засилувања за следната сезона. Поради ниската откупна клаузула во договорот со Барселона, Самуел Умтити се наоѓа на листата од трансфер желби на неколку клубови, од кои најзаинтересиран е Манчестер Јунајтед.
Европските медиуми деновиве се фокусирани на интересот на Манчестер Јунајтед за дефанзивецот на Барселона, Самуел Умтити.
Францускиот стопер Самуел Умтити потпиша за Барселона во 2016 година, кога во договорот му беше ставена откупна клаузула од 60 милиони евра, која во тогашниот пазар изгледаше доволна за да го задржи играчот во клубот.
Но, во последната година трансфер пазарот стана многу поскап и сега цената од 60 милиони евра не изгледа голема, посебно ако се земе предвид квалитетот на Умтити. Манчестер Јунајтед сака да го искористи овој пропуст на Барселона и да го купи Умтити додека тој не потпишал нов договор.
„Не се работи само за Манчестер Јунајтед, туку и други клубови се заинтересирани. Преговорите за нов договор уште не се започнати, но мојот фокус е само на Барселона“, изјави Умтити.
Самуел Умтити е еден од клучните играчи на Барселона, која силно чекори кон нова титула во Ла Лига. Французинот има само 24 години, но игра со многу искуство, најмногу поради тоа што кариерата ја започна многу млад, во екипата на Лион.