Шестата генерација на моделот Patrol на Nissan постои речиси 13 години, но тјунерот сепак му го даде вниманието што дефинитивно го заслужува.
Станува збор за Manhart, германски тјунер кој се прослави со проекти базирани на модели на BMW, но сѐ повеќе ја проширува својата понуда. Досега видовме тјунирани верзии на Defender, Audi RS3 и AMG SL моделот, меѓутоа, по серијата европски автомобили, Manhart се посвети на еден „Јапонец“.
За проектот, германскиот тјунер избра помоќна верзија Nismo која потекнува од 2015 година, а беше редизајнирана на почетокот на минатата година. Теренецот со високи перформанси го започна животот како подобрен модел и доби огромни бандажи од 24 инчи. Исто така, тој е спуштен и изгледа „поопасно“.
Теренецот сè уште е придвижуван од 5,6-литарски V8 мотор, но веќе не е атмосферски бидејќи Manhart вгради компресор и ја зголеми моќноста на 650 КС и 600 Nm вртежен момент од стандардните 428 КС и 560 Nm. Силата се пренесува на двете оски преку седумстепен автоматски менувач. Patrol Nismo сега има нов издувен систем со поагресивен звук.
Нема информации за новата изведба, но познато е дека стандардниот Petrol Nismo од 0 до 100 km/h забрзува за 7,3 секунди. Ако тоа не изгледа импресивно, тогаш треба да се запомни дека тежи 2.665 килограми.
Надворешноста и внатрешноста се карактеризираат со црна и темна тема, а Manhart ја прекри кабината со кожа и Алкантара.
