Рускиот претседател Владимир Путин денеска од поголемиот дел од светот добива честитки по повод новата победа на претседателските избори, но и покрај тоа ниту еден западен лидер досега не му ја честита победата.
Германската канцеларка Ангела Меркел ќе му честита на рускиот претседател Владимир Путин на реизборот и во таа прилика ќе изнесе и несогласувања, соопшти денеска нејзиниот портпарол.
„Таа наскоро ќе му испрати телеграм на Путин и мислам дека е природно, покрај честитките, да се постави прашањето за идните предизвици во германско-руските односи. Се разликуваме во ставовите со Русија и многу јасно и прецизно ја критикуваме руската политика, како и политиката во Украина и Сирија“, изјави портпаролот Штефан Зајберт.
Тој, меѓутоа, додаде и дека е многу важно да се одржи дијалог со руските лидери.
Кинескиот претседател Си Џинпинг денеска ги поздрави руско-кинеските односи, кои се на највисоко ниво и пример за меѓународни односи. Си во пораката до Путин наведе дека односите меѓу Москва и Пекинг се на „најдобро ниво во историјата и даваат пример за нов тип на меѓународни односи базирани на меѓусебна почит, еднаквост и правда“.
Иранскиот претседател Хасан Рохани му честиташе „убедлива победа“ на Путин и го повика на засилување на билатералните односи.
„Сигурен сум дека во текот на вашиот нов мандат односите на нашите земји се повеќе и повеќе ќе се развиваат“, пишува Рохани во пораката до Путин.
Францускиот Национален фронт победата на Путин ја оцени како знак на „стабилност и демократските темели“.
Честитки до Путин стигнаа и од лидерите на Казахстан, Белорусија, Венецуела, Боливија и Куба.
„BBC“ пренесува дека покрај Меркел, која се уште не му честиташе но го најави тоа, ниту еден друг западен лидер не му врачи честитки на Путин за реизборот.