Нобеловата награда за литература годинава ѝ припадна на американската поетеса Луиз Глук.
Шведската академија на науките одлучи да ја награди американската поетеса „за нејзиниот непогрешлив поетски глас кој со својата строга убавина, го прави индивидуалното постоење универзално“.
На прашањето што ѝ значи добивањето на Нобеловата награда, во телефонско интервју Глук рече:
„Првата помисла ми беше дека нема да имам веќе пријатели, бидејќи сите мои пријатели се писатели“, рече таа.
Родена во 1943 година, Луиз Глук има напишано 12 збирки поезија и книга есеи за поезијата, наречена „Докази и теории“. Нејзината последна збирка од 2014 година е насловена „Верна и доблесна ноќ“.
За време на нејзината шестдецениска кариера, таа ги истражуваше траумата, смртта и исцелувањето, низ песни за кои некои научници тврдат дека се всушност исповеди.
Луиз Глук пишуваше за нејзината анорексија кога била тинејџерка, за што подоцна рече дека е резултат на нејзините напори да воспостави независност од мајка ѝ. Таа исто така пишуваше и за смртта на нејзината постара сестра, која починала уште пред Луиз да се роди.
Додека била на терапија, таа решила да оди на работилници за поезија и додека студирала започнала да го развива својот поетски глас. Таа ја објави својата прва збирка „Првороденче“ во 1968 година. Ја доби Пулицеровата награда за поезија во 1993 година за нејзината збирка „Див ирис“.
Таа беше прогласена за американски лауреат на поетите во 2003 година, а во 2016 година го доби Националниот хуманитарен медал од тогашниот претседател на САД, Барак Обама.
