Добитник на годинашната Нобелова награда за медицина и физиологија е Швеѓанецот Сванте Паабо за неговата работа на геномите на изумрените хоминиди и човечката еволуција, соопшти Нобеловиот комитет во Стокхолм.
Со прогласувањето на добитникот на Нобеловата награда во категоријата медицина на Институтот Каролинска во Стокхолм започна неделата во која ќе бидат соопштени и наградите за физика (вторник), хемија (среда), литература (четврток) и мир (петок). Во Осло се соопштува само добитникот на Нобеловата награда за мир.
Нобеловата награда за економија ќе биде објавена следниот понеделник, иако таа не се заснова на конечната волја на донаторот на наградата и изумител на динамитот Алфред Нобел (1833-1896).
Наградите ќе бидат доделени на годишнината од смртта на Нобел на 10 декември.
Минатата година, Нобеловата награда за медицина им припадна на научниците Дејвид Јулиус и Ардем Патапутијан за откритието на клеточните рецептори кои луѓето ги користат за да почувствуваат температура и допир.
Нобеловите награди се придружени со паричен износ од 10 милиони шведски круни по категорија.
