Марк Закерберг и Илон Маск се „најголемите диктатори“, изјави добитничката на Нобеловата награда за мир Марија Реса.
Оваа американско-филипинска новинарка ја доби Нобеловата награда во 2021 година, а сега зборуваше за слободата на медиумите на еден литературен фестивал.
Таа со години се бори против обвинувањата изнесени во времето на поранешниот филипински претседател Родриго Дутерте, но сепак го смета за „далеку помал диктатор во споредба со Закереберг или Маск“, како што истакна таа.
„Овие двајца докажаа дека сите ние, без разлика на култура, јазик или место на живеење, имаме многу заедничко бидејќи манипулираат со сите на ист начин. Социјалните мрежи можат да ни ги променат чувствата, што влијае на тоа како се однесуваме и како го гледаме светот “, изјави Реса.
„Начинот на кој технолошките компании промовираат поларизација, страв, гнев и омраза не менува на лично и на општествено ниво“, рече таа, додавајќи дека треба да се направат две работи за да се промени ова.
Прво, смета таа, треба да се укине законот во САД според кој технолошките компании не може да бидат тужени за содржина објавена од корисниците на нивните социјални мрежи. Втората, смета нобеловката, е децата да се држат подалеку од социјалните мрежи додека не станат доволно возрасни.
Таа вели дека е „одлична“ идеја да се забрани TikTok во САД и Италија, но дека „не треба да бидеме загрижени само за тоа, туку за сите социјални мрежи и интернетот воопшто“.
