Баерн и Севиља вечерва во Будмпешта ќе се борат за Суперкупот на УЕФА, а за голманот на баварскиот тим ваквата пресметка има посебен шмек.
Баерн победи на последните 31 од 32 натпревара, а последен пат ја почувствува горчината на поразот на 7 декември лани кога загуби од Борусија во Менхенгладбах. Од ремито без голови со Лајпциг на 9 февруари годинава е во серија од 22 победи по ред во сите натпреварувања. Во меѓувреме ги освои Бундеслигата, ДФБ Купот и Лигата на шампиони.
„Кога ќе освоите Триплета, секој тим сака да ве победи. Но, ние не сакаме да им го дозволиме тоа. Во победничка форма сме, сѐ уште сме во активна победничка серија и сакаме да ја продолжиме колку што е можно подолго“, рееч Нојер.
„За мене лично ова е посебен натпревар. Тие од нас кои беа во Баерн кога игравме против Челси во Суперкупот во 2013 знаат како е. Тоа беше навистина посебно чувство. Играчите кои играа тогаш можат да го потврдат тоа. Имаше вистинска драма со пенали на крајот“, се сеќава тој.
Од тој Суперкуп игран во Прага дел од Баерн сѐ уште се Мануел Нојер, Жером Боатенг, Дејвид Алаба и Томас Милер. Тогаш натпреварот заврпи 1:1, па 2:2 по продолженија, а Баерн со 5:4 славеше на пенали.
„Два шампиона играат еден против друг. Севиља како освојувач на Лига Европа и ние, како победници на Лигата на шампионите. Токму затоа ова е навистина специјален натпревар. Многу тимови со задоволство би си го трампале местото со нас, а ние тоа го вреднуваме“.
„Кога сте имале долга кариера како Милер, Алаба или јас, кои сме во Баерн веќе долго време, свесни сте дека сте освоиле многу титули, но секогаш постои повеќе“, вели единицата на Баерн.