Ноќта што сите ја чекаа: Дончиќ дебитираше за Лејкерс во триумфален почеток на новата ера

Лос Анџелес Лејкерс на домашен терен ја совлада Јута Џез со 132:113, а натпреварот го одбележа дебито на новиот играч на тимот - Лука Дончиќ.

Словенецот неодамна им се приклучи на Лејкерс од Далас Маверикс во спектакуларен трејд, а ноќеска за прв пат играше со еден од најдобрите кошаркари на сите времиња, Леброн Џејмс.

Дончиќ мина 23 минути на паркетот и веднаш покажа дека ќе биде одлично засилување за Лејкерс. Постигна 14 поени и додаде 5 скока и 4 асистенции.

Лејкерс добро го отворија натпреварот и по првата четвртина имаа 12 поени предност. До полувремето водството само растеше и веќе беше познат победникот од овој дуел (72:47).

Во преостанатиот дел од мечот кренаа рачна, па Јута кон крајот успеа само донекаде да го ублажи тешкиот пораз.

Џејмс беше најефикасен кај Лејкерси со 24 поени, додека Ривс додаде 22. Единствени расположени кај Јута беа Колинс и Марканен со по 17 поени.

Лејкерс моментално се на четвртото место во Западната конференција на НБА со 32 победи и 19 порази, додека Јута е на 14. место со скор 12-40.

Популарниот клуб од Градот на ангелите во оваа прилика реши да го почести секој навивач кој дојде на дебито на Словенецот.

Пред почетокот на натпреварот, секој навивач во салата најде уникатен дрес на Лука Дончиќ со бројот 77 на своето столче, а целата сала беше исполнета со духот на дебито на големиот Словенец.

 

 

 

 

View this post on Instagram

 

 

 

 

 

 

 

 

 

 

 

A post shared by Los Angeles Lakers (@lakers)

Самиот Лука ја направи увертирата, донираше 500.000 долари пред натпреварот за да им помогне на погодените од пожарите во Лос Анџелес, потпишувајќи се како „вашиот нов сосед“.