Голгетерот на Манчестер Сити ќе го пропушти отворањето на квалификациите за ЕУРО 2024 откако поради повреда нема да ѝ биде на располагање на Норвешка против Шпанија и Грузија.
Ерлинг Браут Холанд се повреди на четвртфиналниот дуел од ФА купот против Барнли и тоа ќе го чини пропуштање на важните први два натпревара на неговата репрезентација.
„Се надевавме дека ова е само полесна повреда, но по вчерашните испитувања и прегледи стана јасно дека нема да конкурира за натпреварите против Шпанија и Груизја“, вели Оле Санд, доктор во репрезентацијата на Ноирвешка, пренесува Фудбалската федерација на Норвешка.
Додаде дека Холанд опоравувањето ќе го продолжи во својот клуб.
„На Ерлинг му падна тешко кога сфати дека нема да може да игра за репрезентацијата. За среќа, во овој тим и уште многу самодоверба, талент и кохезија за освојување бодови во наредните натпревари. Продолжуваме да работиме за да бидеме максимално подготвени за сабота и вторник“, рече норвешкиот селектор Столе Солбакен.
Холанд во норвешкиот дрес има 23 настапи и дури 21 гол, додека за Сити има 42 гола во 37 натпревари.
Норвешка е во квалификациската група А заедно со Кипар, Грузија, Шкотска и Шпанија. Квалификациите ги отвора в сабота со гостувањето во Малага против Шпанија, додека во вторник ќе ѝ гостува на Грузија во Тбилиси.
Иако важи за еден од најдобрите фудбалери на денешницата, Холанд нема настап на големо натпреварување со Норвешка откако не успеа да избори пласман на Мундијалот во Катар. Сега Норвешка ќе се обиде првпат по 2000 година да се пласира на едно ЕУРО, што би било и нејзино второ учество.
