Неверојатен мега проект ќе почне да се гради наредната година во Норвешка. Тунел, но тунел на вода по кој ќе минуваат бродови.
Наречен Стад скипстунел, тунелот ќе има за цел да отвори пат низ полуостровот Стад кој поврзува два фјорда и чија обиколка не само што чини време, туку немирното море често се заканува со потопување на бродовите. Дури и старите Викинзи, познати по својата умешност во пловењето, избегнувале да пловат по немирните води околу полуостровот Стад и, изненадувачки, бродовите ги пренесувале преку копното.
Норвежаните одамна размислуваат за тунел, но дури годинава проектот доби одобрување со закажан почеток на изградба наредната година. Тунелот треба да биде висок 49 метри, широк 36, а длабочината на водата 12 метри, што значи дека и крузери ќе можат да минуваат низ него. Должината ќе биде 1,7 километри. Според проценките, готов ќе биде за 3 до 4 години.
Стад скипстунел ќе го скрати патувањето околу полуостровот за 56 километри тешка пловидба.
