Свет

Нов гаф на Трамп: На Норвешка ѝ продава авиони од играта „Call of Duty“

12. јануари 2018 - 15:01 | А.С.

По најновиот лапсус на американскиот претседател Доналд Трамп многумина се прашаа дали можеби тој обожава да игра видеоигри.

Трамп е познат по неговите лапсуси и несмасни изјави, како и дека нема баш најбогат речник. Најновиот гаф на контроверзниот американски лидер се случи на заедничката прес-конференција со норвешката премиерка Ерна Солберг кога ја најави соработката меѓу двете земји на воен и трговски план.

Трамп изјави дека САД почнале „да ги испорачуваат првите млазни борбени авиони F-52 и F-35“ на Норвешка.

Ако тоа не ви значи ништо, имајте на ум дека F-35 е вистински модел на американскиот „ловец“ што го произведува „Lockheed Martin“, а F-52 е борбен авион што постои само во видеоиграта „Call of Duty“.

Многу љубители на играта веднаш почнаа да се шегуваат на социјалните мрежи дека Трамп ѝ продал на Норвешка виртуелни авиони и дека лапсусот му се случил бидејќи цело слободно време го поминува во играње CoD.

Меѓутоа, причината за ваквата грешка, што никако не е оправдување, е дека САД продале 52 авиони F-35 на Норвешка, па претседателот најверојатно само погрешно ги прочитал документите што му ги дале.

Коментирај