Четврта сезона со ред Јувентус не успева да го оствари планираното во најдоброто европско клупско натпреварување откако синоќа доживеа елиминација од португалскиот шампион Порто.
Уште една сезона во Лигата на шампионите заврши лошо и прерано за Јувентус. Откако пред три недели Порто славеше со 2:1 на домашен терен, синоќа на гости во Торино уште во 19-тата минута најави дека „Старата дама“ ќе се соочи со елиминација.
Турскиот бек Мерих Демирал, кој годнава е стандарден во последната линија на Јуве, го сруши Колумбиецот Матеус Урибе во казнениот простор и гостите добија удар од белата точка. Сигурен реализатор беше Сержиу Оливејра кој го испрати Војчех Шченсни на спротивната страна.
На полувреме Порто замина со водство, а Јувентус брзо се врати во игра четири минути по паузата кога Кристијано Роналдо му смири една топка на Федерико Кјеза, а овој од прва ја затресе гостинската мрежа. Потоа се случи пех за гостите кога иранскиот напаѓач Мехди Тареми за само две минути собра два жолти картони и од 54-тата минута Порто остана со играч помалку.
Јуве брзо ја искористи играчката предност и во 63. минута Хуан Куадрадо со одлично нафрлување му сервираше на Кјеза гол со глава за пресврт и 2:1 за Јуве.
Сепак, Јувентус до крајот на натпреварот не постигна нов гол, па бидејќи победи со идентични 2:1 како и Порто на првиот натпревар, се замина во продолженија.
И таму Јуве се мачеше да дојде до гол, а во 115-тата минута Оливејра со својот втор гол ги шокираше домаќините погодувајќи од слободен удар, по земја, од околу триесетина метри. Голот оди на душа на полскиот голман кој несмасно интервенираше.
Јуве веднаш успеа да го врати водството, само две минути подоцна преку Адриен Рабјо, но касно беше за уште еден, па се соочи со елиминација.
Така, втора сезона по ред Кристијано Роналдо и дружината застануваат во осминафиналето. Лани беше Лион, сега Порто и повторно поради гол на гости.
Јуве брка финале од 2017 кога со 4:1 беше прегазен од Реал Мадрид и тогаш Кристијано Роналдо, кој летото 2018 премина во Јуве. А, пак, на пехарот чена од 1996 година кога на пенали го совлада Ајакс и го освои само вториот во својата историја.
