Елиминацијата на Русија и 60 гол на Кристијано Роналдо го одбележаа последното трето коло во групата А на Купот на конфедерации во Русија.
Руската репрезентација изгуби од Мексико, кој славеше со 2:1 во директниот дуел за втората позиција на табелата.
Домашната репрезентација поведе во 25 минута со погодокот на Самедов, само пет минути подоцна израмни Арухо кому во листата на стрелци во 52 минута му се придружи и соиграчот Лозано. Русите во последните половина час од натпреварот играа без исклучениот Жирков.
Португалија во вториот меч во групатаго победи Нов Зеланд со 4:0 со головите на Роналдо во 33 минута од пенал, на Бернардо Силва во 37, на Андре Силва во 80 и на Нани во првата од судиското надополнување.
Португалскиот капитен по 60 пат погоди во меѓународни средби од натпреварувачки карактер што досега не му успеало никому во историјата на фудбалската игра.
Утре се играат мечевите од последното коло во групата Б по што ќе бидат познати и полуфиналните двојки. Германија за противник го има Камерун, а Чиле ќе игра со Австралија. Чилеанците и Германците имаат по четири бода, Камерунците и Австралијците по еден.