Нов шокантен трејд: Фокс кај Вемби во Спарс, ЛаВин отиде во Сакраменто

Прашината во НБА сѐ уште не стивнува по заминувањето на Лука Дончиќ од Далас Маверикс, а ден по оваа драма најголемата кошаркарска сцена во светот ја тресе уште еден голем трејд. Диерон Фокс замина од Сакраменто Кингс во Сан Антонио Спарс, додека во трејд пакет со три тима, кошаркарот на Чикаго Булс, Зек ЛаВин, заврши кај Кингс.

Тоа значи дека потенцијалната замена за Мајкл Портер дефинитивно нема да се пресели во Денвер оваа зима, па франшизата од Колорадо ќе мора да се сврти кон други решенија, но, да се вратиме на темата...

Трејдот со три тима што ги вклучи Сан Антонио, Чикаго и Сакраменто беше доста обемен. Покрај Фокс, Спарс го добија и Џордан МекЛафлин, додека, од друга страна, Кингс тргуваа и за Сидни Сисоко, како и еден куп пикови од првиот и вториот круг. Што се однесува до Чикаго, тие ги добија Зак Колинс, Треј Џонс и Кевин Хертер. Така, на крајот, 13 играчи беа замешани во овој трејд.

Со ова Сан Антонио доби ол-стар плејмејкер кој заедно со Виктор Вембанјама ќе ја претставува иднината на Спарс. И двајцата се млади и талентирани кошаркари, а бројките на Фокс сезонава покажуваат колку е сигурен играч, со просек од 25 поени, 5 скокови и 6 асистенции по натпревар.

Исто така, „Кралевите“ не се снајдоа лошо во овој трејд, бидејќи покрај ЛаВин, момче со 25 поени во рацете, добија и многу играчи кои ќе бидат гаранција за во иднина, поточно по 3 пика во првото и второто коло. 

Единствениот сомнеж остана кај Булс...

Новите засилувања не се од калибарот на играчи кои многу ќе им помогнат во плеј-офот, но барем се ослободија од дебелиот договор на ЛаВин, според кој до летото 2027 година ќе добиваше околу 45 милиони по сезона.