Објавен е целосниот трејлер за документарецот за легендарниот клуб „Студио 54“.
Њујоршкиот клуб беше епицентарот на хедонизмот во 70—тите, монументален магнет за ѕвездите каде владееше декаденција, секс и дроги, локал што функционираше по свои правила и ги величаше екцентризмот и хедонизмот.
Основачите на „Студио 54“ Иан Шрејгер и Стив Рубел потрошиле стотици илјади долари за професионален дизајн на светло и задржале голем дел од претходните телевизиски и театарски реквизити на локацијата за да направат уникатен диско клуб што стана познат по ѕвездената клиентела, листите за чекање и правилата за влез, како и по отвореното користење на дроги внатре во локалот.
Енди Ворхол, Елизабет Тејлор, Бјанка Џегер, Лајза Минели, Келвин Клајн биле само дел од редовните славни гости во клубот што го нарекуваа „забавен парк за возрасни“.
Режисерот Мет Тирнауер направи хронолошки приказ на подемот и падот на основачите на клубот – двајцата најдобри другари од Бруклин кои го освоија Њујорк и потоа гледаа како нивното дело им се руши пред очи.