Италијанското стопанство влезе во рецесија, покажуваат прелиминарните податоци за БДП за последниот квартал од минатата година, објавени денеска.
Според овие податоци, италијанското стопанство во последниот квартал од 2018 година опадна за 0,2 отсто, што по падот од 0,1 отсто во третиот квартал, значи влез во рецесија.
Ова не беше неочекувано, со оглед на тоа дека италијанскит премиер Џузепе Конте уште вчера изјави дека очекува вакви статистики, а претходните прогнози укажуваа дека можно е едно од најголемите економски стопанства да влезе во негативна фаза од циклусот.
Ова е прв пат од 2013 година една голема европска земја, членка на ЕУ и на Г7, да влезе во рецесија.
Италијанската централна банка, како и ММФ, прогнозираа дека растот на италијанскиот БДП ќе има раст на годишно ниво од 0,6 отсто, што е двојно помалку од прогнозата за еврозоната.
Рецесијата во Италија секако не е добра вест за цела Европа, со оглед на тоа дека и останатите големи економии ги очекува забавување. На пример, германската влада во 2019 година очекува раст од најмногу 1 отсто.
Последиците од забавувањето на италијанското стопанство би можело да се одразат и на светско ниво, особено во поглед на надворешната трговија.