Новозеландскиот Истражувачки институт ГНС предупреди дека постојат 50 отсто шанси во следните 24 часа да дојде до нова ерупција на вулканот на Белиот Остров, која би можела да биде со слична јачина.
– Проценивме дека во следните 24 часа веројатноста дека ќе дојде до нова ерупција е голема. Постои исклучително мала веројатност дека каков бил налет на пепел ќе стигне до копното, но гасот може да се раствора зависно од моментната насока на ветрот, изјави вулканологот Геф Килгур.
Предупредувањето за ерупција на вулканот останува на нивото три, што укажува дека се случуваат мали локални ерупции.
Од вчерашната ерупција, сеизмичките активности се намалиле, меѓутоа ГНС наведува дека и понатаму се набљудува локалното испуштање на пареа и кал од активниот вентилациски простор.
Се претпоставува дека луѓето кои се наоѓале во близина на езерото, при ерупцијата веројатно биле погодени од топла вода, камења, предмети и имале проблеми со дишните патишта. Хоспитализираните имале изгореници, повреди од експлозија и проблеми со дишењето.
*Внимание: Содржината може да ве вознемири
Австралискиот премиер Скот Морисон изјави денеска дека 11 државјани на Австралија се водат како исчезнати, додека 13 се хоспитализирани по ерупцијата на вулканот на Нов Зеланд.
Се претпоставува дека тројца од петте жртви од ерупцијата се австралиски државјани, истакна Морисон.
– Стравувам дека информациите ќе бидат и полоши во текот на денешниот или следните денови. Ова е ужасна трагедија, додаде австралискиот премиер.
Вкупно 24 австралиски државјани, на возраст од 17 до 72 години, биле дел од групата, која со крузер пристигнала на белиот остров да го истражува вулканот кога дојде до негово активирање.
Некои од повредените се наоѓаат во критична состојба и се распоредени во неколку новозеландски болници.