Скопје, 2 декември 2019 (МИА) – Сеизмолошката опсерваторија при Природно-математичкиот факултет во Скопје соопшти дека утрово е регистриран нов земјотрес со епицентар во Албанија, на 160 километри југозападно од Скопје.
Земјотресот се случил во 9 часот и 26 минути со локална Рихтерова магнитуда од 4,3.
-Според досегашните податоци, земјотресот е почувствуван во југозападните делови на земјава (Кичево, Охрид и Битола) со интензитет од III-IV степени според Европската макросеизмичка скала и со интензитет од III степени во Скопје и околината според истата скала, соопшти Опсерваторијата.
Тлото не мирува
Тлото во Албанија не мирува, утрово од седум до девет часот регистрирани се пет потреси.
Покрај тој во 9 часот и 26 минути, нешто пред осум часот регистран е земјотрес со јачина од 3,2 степени. Останатите три се со послаба јачина.
Од утрото на 26 ноември, кога беше регистриран разорниот земјотрес со јачина од 6,4 степени според Рихтер, до денес регистрани се 1.376 потреси.
Освен огромната материјална штета, разорнот земјотрес однесе и 51 жртва, над 2.000 луѓе се повредени, од кои неколку сѐ уште се во тешка здравствена состојба.