Македонската фудбаслка репрезентација и во третиот септемвриски натпревар не успеа да дојде до победа откако денеска одигра без голови против Романија.
Третиот квалификациски натпревар во овој септемвриски ФИФА прозорец селекторот Благоја Милевски се реши да го почне со идентичен состав како оној кој одигра одлични 75 минути на гости кај Исланд. Столе Димитриевски помеѓу стативите, во одбраната Езџан Алиоски лево, Дарко Велковски и Висар Муслиу во средината и Стефан Ристовски десно, во средниот ред Елиф Елмас, Енис Барди и Стефан Спировски, а во нападот лево Дарко Чурлинов, на средината Милан Ристовски и десно Тихомир Костадинов.
Иако Македонија доминираше од самиот почеток, сепак не успеа сериозно да го загрози голот на гостинскиот голман Ница. Романија се обидуваше од контри, иако тоа ретко ѝ успеваше, но во 21. минута малку фалеше да го отвори резултатот. Муслиу погреши и дозволи да биде наивно поминат, а Сореску упати добар удар кој уште подобро беше одбранет од Димитриевски.
Во 34. минута Македонија конечно имаше прва сериозна шанса и тоа откако Елмас сам си направи акција, продре во гостинскиот шестнаесетник, се избори за удар, но недоволно за да се совлада Ница.
Всушност, тоа беа и единствените две добри шанси во првиот дел кој заврши без голови.
Првата шанса после паузата дојде во 51. минута и повторно преку Елмас кој сам продре дриблајќи противнички играч, но биеше во нозете на голманот Ница, а на одбранетата топка проба со ножички, но непрецизно.
Во 58. минута нова шанса за нашите. Елмас прими долга топка и несебично му намести на Барди, кој биеше од прва но току онаму каде што беше поставен Ница, кој запиша нова одбрана.
Потоа во 73. минута Барди одлично дриблаше и шутна од дваесетина метри, но повторно без посериозна закана кон Ница.
Натпреварот заврши со најнеполупарниот резултат, втор пат овој месец откако и со Ерменија на втори исто така одигравме 0:0. Воедно, репрезентацијата и по седми пат на Денот на независноста не успеа со победа да го израдува македонскиот народ.
Наредните натпревари за македонската репрезентација се во октомври кога прво му гостуваме на аутсајдерот Лихтенштајн на осми, а потоа на празникот 11-ти Октомври ја пречекуваме Германија.
Табела:
- Германија 15
- Ерменија 11
- Романија 10
- Македонија 9
- Исланд 4
- Лихтенштајн 1