Нуклеарно вооружената Северна Кореја денеска, првпат по пет години, истрела балистичка ракета над Јапонија, која ги предупреди своите граѓани да се евакуираат.
Јапонската влада издаде предупредување до граѓаните додека проектилот прелетуваше над земјата, пред да падне во Тихиот Океан.
Токио соопшти дека нема преземено одбранбени мерки за уништување на ракетата, прва што прелетала над островите од 2017 година.
„Серијата акции на Северна Кореја, вклучително и повторените лансирања на балистички ракети, го загрозуваат мирот и безбедноста на Јапонија, регионот и меѓународната заедница и претставуваат сериозен предизвик за целата меѓународна заедница, вклучително и Јапонија“, рече владиниот портпарол Хирозаку Мацуно.
Набрзо потоа, јапонскиот премиер го нарече чинот на Пјонгјанг „варварски“.
Воениот штаб на Јужна Кореја соопшти дека се чини дека станува збор за ракета со среден дострел лансирана од севернокорејската провинција Јаганг.
Пјонгјанг веќе ја искористи областа за лансирање на своите ракети, вклучително и неколку за кои тврди дека се „хиперсонични“.
Јапонската телевизија Asahi, повикувајќи се на неименуван извор од владата, објави дека ракетата паднала на околу 3 илјади километри од Јапонија.
Поради севернокорејската ракета во прекин е железничкиот сообраќај во северните региони на Јапонија, јави јапонската телевизија NHK.
Ракетните и нуклеарните програми на Северна Кореја се забранети со резолуциите на Советот за безбедност на Обединетите нации.
