Интернетот требаше да биде алатка што ќе му помага на човекот да има брз и лесен пристап до информации. Но, се чини дека сѐ почесто е извор на дезинформации и теории на заговор.
Оние кои ги шират овие теории на заговор многу често се побројни и погласни од веродостојните извори, а на луѓето се чини им е полесно да веруваат во небулози отколку во едноставната вистина.
По „теориите“ дека Земјата е рамна, дека Месечината не постои и дека Бил Гејтс сака да ги чипира луѓето преку вакцина, стигна најновата лудост: компанијата Victoria's Secret ги следи жените кои носат нејзина долна облека преку чипови во градниците и тангите.
Овие „теоретичари на завери“ оперираат главно на социјалните мрежи и други популарни онлајн платформи како TikTok, YouTube и Reddit, каде е најлесно некоја „информација“ за кратко време да стане вирална, особено ако (неосновано) ја поврзете со теми како трговија со луѓе, национална безбедност и слично.
Една ваква објава, на пример, имаше 7.400 прегледи и 200 ретвитнувања во еден ден пред да биде означена како лажна вест од Twitter.
На оваа дезинформација мораше да реагираат директно од компанијата Victoria's Secret. Сепак, се работи за имиџ.
Оттаму објаснуваат дека во нивната долна облека не се вметнуваат никакви мистериозни чипови за следење луѓе, туку дека станува збор за RFID ознаки кои се потребни за да се отчита производот на скенер. Употребата на овие ознаки во модната индустрија е интерна, за поефикасно следење и управување со инвентарот во магацините. Исто така, сѐ почесто се користат за заштита од фалсификати, бидејќи со RFID ознаката може да се утврди местото на производство и испорака.
