Најдобриот тенисер во светот Новак Ѓоковиќ уште една сезона заврши како најдобар на АТП листата.
По 7. пат во кариерата, постигна нов рекорд. Во текот на годините доби многу битки, како и оваа последна во Париз.
Новак во разговор со српските новинари одговори и на прашањето кои особини би ги издвоил, а коишто биле клучни за да успее.
„Пожртвуваност и посветеност дефинитивно бидејќи е неопходно. За да бидете на врвот на овој индивидуален спорт кој бара многу, неопходно е да преземете одговорност за вашите постапки, за вашиот животен стил. Тенисот е индивидуален спорт и затоа сè е важно, начинот на кој тренирате, како тренирате, како се храните, колку спиете. Сето тоа влијае на крајниот производ односно резултатот кој го добивате на терен“, вели Ѓоковиќ и додава:
„Се трудам да применувам некои новини, да воведам нови детали, без разлика дали станува збор за исхраната, тренингот, менталниот пристап кој за мал процент може да ми ја подобри играта и состојбата на умот, како и емоциите на терен. Имам своја формула, но и таа се менува бидејќи сум човек кој се менува, како и сите други. Сите се менуваме, секоја година, секој ден, така што мора да бидеме отворени за прилагодување на промени и внесување на нови работи во животот“, вели светскиот рекет број 1.
